Góð ávöxtun á fyrri helmingi ársins

Ávöxtun ævisafna Almenna lífeyrissjóðsins hefur verið mjög góð á fyrri helmingi ársins. Ævisöfnin fjögur hafa hækkað um 5,9-11,2% á árinu sem samsvarar 1,4-11,7% raunávöxtun á ársgrundvelli.

Vísitala aðallista Kauphallar Íslands lækkaði um 4,8% í júní og hefur lækkað um 1,6% á fyrri helmingi ársins. Heimsvísitala erlendra hlutabréfa MSCI stóð í stað í dollurum í júní og hækkaði um 6,8% í íslenskum krónum í mánuðinum. Heimsvísitalan hefur hækkað um 28,7% í íslenskum krónum frá áramótum. Íslenska krónan hefur veikst um 21,3% gagnvart dollara á árinu. Ávöxtunarkrafa íbúðabréfa hækkaði í júní og hækkuðu skuldabréf því óverulega í verði í mánuðinum. Ávöxtunarkrafan á lengstu skuldabréfunum var 4,17% í lok mánaðarins. Viðmiðunarvísitala skuldabréfa ævisafna I og II hefur hækkað um 5,0% á árinu.

Taflan sýnir ávöxtun einstakra eignaflokka og viðmiðunarvísitölur safnanna.

Eignir Ævisafns IV voru ávaxtaðar í stuttum óverðtryggðum skuldabréfum og á verðtryggðum innlánsreikningi. Gengi Ævisafns IV hækkaði um 1,1% í júní og hefur hækkað um 5,9% á fyrri helmingi ársins sem samsvarar 1,4% raunávöxtun á ársgrundvelli.