2016 var ár íslensku krónunnar
11. janúar 2017
Árið 2016 einkenndist af styrkingu íslensku krónunnar gagnvart erlendum gjaldmiðlum og hafði styrkingin mikil áhrif á ávöxtun safna sem fjárfesta í erlendum verðbréfum (Ævisafn I, II, III og samtryggingarsjóður). Íslenska krónan styrktist um 12,9% gagnvart Bandaríkjadal og um 15,7% gagnvart evru á árinu.
Ávöxtun eignaflokka var með ágætum á árinu, sérstaklega í löngum óverðtryggðum skuldabréfum auk þess sem ávöxtun innlendrar hlutabréfaeignar Almenna var töluvert hærri en ávöxtun á markaði. Heimsvísitala hlutabréfa hækkaði um 7,5% í USD en styrking ISK varð til þess að ávöxtun mæld í ISK var neikvæð um 6,4%. Verðbólga ársins 2016 var 2,1%.
Ágæt ávöxtun var í söfnum Almenna lífeyrissjóðsins á árinu, nema í söfnum sem eiga hátt hlutfall erlendra verðbréfa.
- Hæsta ávöxtunin var í Ríkissafni stuttu sem hækkaði um 5,3% (3,1% raunávöxtun).
- Blönduð söfn, sem fjárfesta í skuldabréfum, hlutabréfum og innlánum, áttu misjafnt ár og var ávöxtun þeirra á bilinu -0,5% til 3,9%. Helsta skýringin á ólíkri ávöxtun er mismunandi eignasamsetning og styrking ISK.
- Ríkissafn langt hækkaði um 4,9% (2,8% raunávöxtun)
- Innlánasafn hækkaði um 4,2% (2,0% raunávöxtun)
Raunávöxtun hefur verið góð undanfarin ár og síðastliðin fimm ár hefur meðalávöxtun verið á bilinu 1,7% til 6,2% á ári í söfnum lífeyrissjóðsins.
Upplýsingar um afkomu ávöxtunarleiða Almenna lífeyrissjóðsins:
| Blönduð söfn liðu fyrir styrkingu krónunnar | Blönduð söfn (Ævisafn I, II, III og samtryggingarsjóður) áttu misjafnt ár þar sem söfn með hærra hlutfall erlendra verðbréfa liðu fyrir styrkingu krónunnar. Lægst var ávöxtunin á Ævisafni I (-0,5%) en erlend verðbréf vega um 45% af eignum þess safns. Hæsta ávöxtunin var í Ævisafni III (3,9%) en þar vega erlend verðbréf tæp 9% af eignum. Raunávöxtun blandaðra safna var á bilinu -2,5% til 1,8%. |
| Ríkissafn langt hækkaði um 4,9% | Ríkissafn langt hækkaði um 4,9% á árinu. Ávöxtunarkrafa langra ríkisskuldabréfa breyttist lítið frá upphafi til loka árs og skýrir verðbólga og vaxtatekjur því hækkun safnins að mestu þetta árið. |
| Ríkissafn stutt hækkaði mest á árinu | Ríkissafn stutt hækkaði um 5,3% á árinu sem samsvarar 3,1% raunávöxtun. Ávöxtun safnsins skýrist af lækkun á ávöxtunarkröfu óverðtryggðra skuldabréfa og lágri verðbólgu. |
| Innlánasafn hækkaði um 4,2% | Innlánasafnið hækkaði um 4,2% á árinu sem samsvarar 2,0% raunávöxtun. Safnið ávaxtar eignir sínar á bundnum innlánsreikningum og vógu verðtryggð innlán um 93% af eignum í árslok. |
Góð eignadreifing
Ávöxtun verðbréfasafna ræðst af eignasamsetningu og ávöxtun einstakra verðbréfaflokka. Almenni lífeyrissjóðurinn leggur mikla áherslu á góða eignadreifingu til að draga úr heildaráhættu safnanna. Þrátt fyrir gjaldeyrishöft á liðnum árum eru eignir ævisafna og samtryggingarsjóðs vel dreifðar á útgefendur, atvinnugreinar og lönd. Sjóðurinn birtir mánaðarlega upplýsingar um ávöxtunarleiðir þar sem m.a. má lesa um eignasamsetningu. Smellið hér til að skoða upplýsingablöðin.